Album review #4 со @izdavackakukja: „Everything You’ve Come To Expect“ од The Last Shadow Puppets

“It was you, and me, and Miles Kane…”

Според мене, “Everything You’ve Come To Expect” е еден од најдобрите албуми во последните 30тина години. Станува збор за вториот албум на The Last Shadow Puppets, издаден во 2016 година, во периодот кога Arctic Monkeys беа на хијатус. Албум од врвен калибар, го слушаш два пати и веднаш сакаш да си италијански мафијаш, да носиш сакоа, дрски ципели, залижана фризура и да се заљубиш. “Everything You’ve Come To Expect” е исполнет со bittersweet, љубовни, сексуални песни. На половина од песните можеш да водиш љубов како да нема утре, а на другата половина можеш да танцуваш со девојката (дечкото) додека изгрева сонцето.

Целиот албум е напишан од Alex Turner и Miles Kane (со исклучот на “Miracle Aligner” која е напишана и од Alexandra Savior), во продукција на James Ford. Овие две работи: songwriting-от и продукцијата се она што го прават овој албум необичен, што е природно – бидејќи Alex Turner е еден од најдобрите songwriters од поновите генерации, а James Ford е генијален продуцент. Не заостанува и Miles Kane кој е исто така првокласен музичар, со повеќе одлични песни во својот репертоар како “Loaded”, “Colour of the Trap” и други.

James Ford е светски познат продуцент кој има продуцирано за Arctic Monkeys, Gorillaz, Depeche Mode, Florence and The Machine и многу други. Во “Everything You’ve Come To Expect”, работата си ја има завршено беспрекорно. Го има направено слушањето на албумот да биде едно прекрасно искуство, слоеви над слоеви од ефекти и звуци, продукција чиста и остра како срча. Секоја песна звучи како да е симфонија бидејќи во секоја песна има цели оркестри. Нема делче од етерот кое не е исполнето со пријатен и уникатен звук, и нема песна која не се вклопува во целосната слика на албумот.

Првата песна од албумот е “Aviation”. Започнува со зуење на виолини кое го најавува почетокот на албумот, по што се впушта во предобар риф кој се провлекува низ целата песна. Проследен од тивка и брза акустична гитара заедно со цел оркестар, песната тотално доминира, се до самиот крај кога има одлична кулминација на виолини, клавири, труби и што уште не. Прво што паѓа во очи е феноменалниот бас. Додека сите го користат басот како филер инструмент, Alex го користи како ладно оружје. Во сите проекти од кои е дел, бас гитарата е уникатна и одлично испродуцирана. Во поново време, ретко е да се сретне добар бас во рок песна, за што овој албум добива бонус поени.

“Miracle Aligner” е втората песна од албумот и последниот сингл во него. Можеби најпознатата песна од The Last Shadow Puppets, пример за одлична продукција. Иако не изгледа така, “Miracle Aligner” е песна за орално задоволување на жени. Името потекнува од британски сленг и е термин кој се користи за некој што прави “чуда со јазикот”.

Ако веќе сте стигнале до тука со читање на оваа рецензија, ве охрабрувам да си ја пуштите “Miracle Aligner” преку линкот погоре, по што сакам да чујам ваш feedback.

“Everything You’ve Come To Expect” е title траката на албумот.

“(Everything that you’ve come to expect)

I guess the coastal air gets a girl to reflect

(Everything that you’ve come to expect)

I just can’t get the thought of you and him out of my head

(Everything that you’ve come to expect)

Everything that I’ve tried to forget

(Everything that you’ve come to expect)

Everything that I live to regret”

Ако некогаш сум прочитал факти, тогаш тоа се во овој рефрен. Го знаете оној феномен кога девојка ви ќе отиде на одмор со другарките на море и ќе се врати со тотално сменет карактер? Девојката што ја сакаш те оставила за друг? Се каеш за нешто што си направил (или уште полошо – нешто што не си направил) и те јаде до ден денес? Ова е песната за тебе. Толку вешто осмислено – да може секој да се пронајде.

Првиот сингл со кој The Last Shadow Puppets го најавија овој албум е феноменалната “Bad Habits”. Вистински rock ‘n’ roll banger. Иако побрза од останатите, оркестарот повторно е сеприсутен. Бонус поени за добрите ad-libs кои не се исфорсирани и не ја уништуваат песната како што е пример во многу рап и трап песни.

“I just sort of always feel sick without you, baby

I ain’t got anything to lick without you, baby”

Со овие стихови започнува “Sweet Dreams, TN”, песна која генијално доловува што значи да си вљубен, разглабајќи ги емотивните и сексуалните аспекти на љубовта. По мој вкус, таа е најдобрата песна во овој албум. Се разликува од другите во тоа што кај неа, главниот фокус е ставен на текстот, а не на мелодијата. Ова е точно барем до крајот, кога песната кулминира со одлично outro во кое рецитирањето се претвара во пеење и фокусот се префрла од текстот на мелодијата – на оркестарот и одличните вокали на Alex Turner. Последните стихови од песната се:

“Baby we ought to fuck

Seven years of bad luck out the powder room mirror

Could I have made it any clearer?

And it's love like a tongue in a nostril

Love like an ache in the jaw

You're the first day of spring with a septum piercing

Little miss Sweet Dreams, TN”

Контекстот на овие стихови е тоа што Alex Turner имал две сериозни врски пред да ја напише оваа песна за тогашната девојка Taylor Bagley – 3 годишна врска со Arielle Vandenberg и 4 години со Alexa Chung. Според старата народна дека ако скршиш огледало ќе те следи 7 години несреќа, Alex алудира дека му биле потребни 7 години лоши врски за да стигне до добрата – онаа со Taylor.

Ако “Bad Habits” е брзиот rock ‘n’ roll banger, тогаш “Used To Be My Girl” е спориот western rock ‘n’ roll banger. Во првата строфа пее Miles Kane, во втората Alex Turner, за третата да ја пеат заедно во хармонија. Песна полна со самодоверба, не само во одличниот текст туку и во начинот на пеењето.

“The Dream Synopsis” е последната песна од албумот, бавна и интровертна балада напишана само од Alex Turner. Доста срцепарателна песна, со необична прогресија на акорди. Некои верзии на албумот “Everything You’ve Come To Expect” содржат уште една песна: “The Bourne Identity”. Од првиот пат кога ја слушнав во 2016 па се до денес, не можам да разберам зошто песнава не е во главниот каталог на албумот. Текстот во песната е генијален и ја прави “The Dream Synopsis” да звучи како да е екстровертна:

“Let's just have a buzz

because by the time I'm done

fucking beating myself up

There'll be nothing left to love

I feel like the sequel

You wanna see but you were kinda hoping they would never make”

Преку алегорија, Alex Turner прекрасно го доловува чувството кога мислиш дека бившата те доживува како одличен прв дел од некој филм, сака да се смирите (sequel) бидејќи во првиот дел сѐ било сјајно, но потсвесно се надева дека тоа никогаш нема да се случи со цел да не се уништат убавите спомени од првиот дел. Пример за ова се продолжетоците на филмовите The Bourne Identity (од каде потекнува името на песната), Star Wars, и мојата последна озбилна врска.

За крај, она што го прави албумот “Everything You’ve Come To Expect” да е ремек-дело се одличните вокали полни со самодоверба, воодушевувачките relatable љубовни текстови, оркестрите во секоја песна и продукцијата која е на највисоко ниво. Според Alex и Miles, албумите на бендот The Last Shadow Puppets се концепирани да бидат трилогија, што го прави “Everything You’ve Come To Expect” втор дел од истата. Со оглед на гласините дека Arctic Monkeys спремаат нов албум, а Miles Kane спрема нов соло албум, изгледа ќе треба да почекаме за третиот и финален албум од трилогијата. Но, земајќи предвид колку се добри првите два, сигурен сум дека и третиот албум ќе биде лудница.

EVERYTHING YOU’VE COME TO EXPECT – The Last Shadow Puppets:

ОЦЕНА: 10/10

ОМИЛЕНИ ПЕСНИ ОД АЛБУМОТ: “Miracle Aligner”, “Sweet Dreams TN”, “Everything You’ve Come To Expect”, “Used To Be My Girl”

НАЈМАЛКУ ОМИЛЕНИ ПЕСНИ ОД АЛБУМОТ: “The Element of Surprise”